| | Rajoni | Bota | Vendi | Shendeti | Kultura | Sporti | Kronike | Politike | Analize | |
|
|
SOVETO- Festa në Afrikën e Jugut për Botërorin e futbollit ka nisur që të enjten në mbrëmje me koncertin e madh të Shakirës dhe Blek Eyed Peas. Një turmë prej 30 mijë vetash e gjitha në delir ndoqi spektaklin e ofruar në stadiumin e Sovetos, ndërkohë që sot në orën 14:00 do të nisë edhe ceremonia e hapjes me 1500 artistë që do të krijojnë një spektakël madhështor. Veç Shakirës, për ceremoninë e hapjes së Botërorit do të jenë edhe këngëtari amerikan R.Kelly, xhaz-meni Hjuxh Masekela, algjeriani Khaled apo nigeriani Femi Kuti.
Një kastë e zgjedhur artistësh, e denjë për të çuar peshë shpirtin e një kombi të tërë. Spektakli do të prezantohet nga muzikanti Lebo M., i lindur në Soveto dhe producent i komedisë muzikore “Mbreti Luan”. Pas ekzibicionesh të shumta, ceremonia do të mbyllet 40 minuta përpara startit të ndeshjes së parë, asaj mes Afrikës së Jugut dhe Meksikës.
Në tribunë ndërkohë pritet të jenë disa nga personalitetet më të lartë të futbollit botëror, aktorë Hollivudi apo kryetarë shtetesh, duke nisur nga Nelson Mandela. Policia ndërkohë ka marrë masa tepër të forta sigurie, duke vënë në aksion mijëra ushtarakë, helikopterë, çminues dhe videokamera mbikëqyrjeje. Në Johanesburg është përdorur çdo lloj mjeti për të evituar që kriminelë, terroristë apo huliganë të kërcënojnë startin e eventit. |
|
|
|
|
|
